Новы душпастыр у Кастамлотах
1 верасьня 2007 году адышоў на пенсію шматгадовы парах неаўніяцкай парафіі ў Кастамлотах на Падляшшы (18 км ад Берасьця, на польскім беразе р. Буг) – Архімандрыт Раман Пентка, марыянін.
Душпастырам у парафіі сьв. Мікіты ў Кастамлотах а. Раман Пентка быў 40 гадоў. За гады яго душпастырства гэтая неаўніяцкая парафія на мяжы Польшчы і Беларусі стала сапраўды духовым цэнтрам сустрэчы Ўсходу і Захаду. Айцец Раман стварыў у Кастамлотах Санктуарыюм Падляшскіх уніятаў, грунтоўна адрамантаваў стары драўляны храм, спрычыніўся да рэстаўрацыі старажытных уніяцкіх абразоў. Сярод гэтых абразоў варта адзначыць ікону патрона парафіі сьвятога велікамучаніка Мікіты, якую ў 1631 годзе, у часы Уніі, падаравала для царквы ў Кастамлотах “Хведора з Прылук” (з прыбужскай вёскі каля Берасьця).
Намаганьнямі а. Рамана Пенткі пры парафіі быў створаны Міжнародны экуменічны цэнтр Nicetianum, у якім вось ужо на працягу некалькіх дзесяцігоддзяў сустракаюцца вернікі розных Цэркваў ня толькі з Польшчы, але і з Беларусі, Украіны, Чэхіі, Славакіі, Расеі, краінаў Балтыі, Германіі, Францыі, Італіі, Бельгіі, Велікабрытаніі, Мальты і іншых краінаў Еўропы.
Ад пачатку 1990-х гадоў архім. Раман гасьцінна адчыніў дзьверы кастамлоцкага храму і парафіяльнага будынку для шматлікіх беларусаў. Тут шматразова ладзіліся катэхетычныя летнікі для беларускай грэка-каталіцкай моладзі, сюды прыязджалі беларускія пілігрымы, каб памаліцца Санктуарыюме Падляшскіх уніятаў, тут праходзілі літургічную практыку семінарысты БГКЦ.
Архімандрыт Раман зьяўляецца вучнем беларускіх марыянаў Тамаша Падзявы і Язэпа Германовіча, а на служэньне ў Кастамлотах блаславіў яго ў 1967 годзе Ўладыка Чэслаў Сіповіч, які ў той час быў Генеральным суперыёрам Ордэну Марыянаў.
У нядзелю, 9 верасьня 2007 году, у рамках Патранальнаяга сьвята парафіі – сьвята велікамучаніка Мікіты, парафіяне і шматлікія сябры кастамлоцкай парафіі разьвіталіся з Архімандрытам Раманам і прывіталі новага душпастыра – айца Зьбігнева Ніканюка, прызначанага Седлецкім рыма-каталіцкім біскупам Зьбігневам Кернікоўскім, якому Кангрэгацыя Ўсходніх Цэркваў даручыла біскупскую апеку над парафіяй у Кастамлотах. Айцец Зьбігнеў Ніканюк паходзіць з іншай прыбужскай вёскі – Пратулін, якая дала Паўсюднай Царкве Пратулінскіх мучанікаў. Ён – нашчадак уніятаў, што сталі мучанікамі за сваю веру.
9 верасьня на сьвяце ў Кастамлотах удзельнічала група пілігрымаў з Беларусі, у тым ліку – семінарысты БГКЦ, што вучацца ў Драгічыне над Бугам (Польшча). Групу беларускіх пілігрымаў узначальваў Апостальскі Візітатар архім. Сяргей (Гаек).
Дастойнаму Архімандрыту Раману выказваем ВЯЛІКІ ДЗЯКУЙ, а новаму параху ўніяцкай парафіі ў Кастамлотах жадаем Божага блаславеньня “на многія леты!”
Новапрызначаны кастамлоцкі парах ужо пасьпеў пазнаёміцца з нашай Царквой у Беларусі – ён прымаў удзел у пілігрымцы Віцебск – Полацак у ліпені гэтага году. Разьвітваючыся з беларускімі пілігрымамі, ён сказаў: “Кастамлоты і надалей чакаюць братоў і сёстраў з Беларусі!”
Мenologion — каляндар літургічнага ўспаміну сьвятых Усходняй ЦарквыПарафія сьв. Мікіты ў Кастамлотах – адзіная на Падляшшы каталіцкая парафія візантыйскага абраду, якая ацалела пасьля Другой усясьветнай вайны ў Польшчы – выпусьціла ў сьвет Menologion, што значыць – «Месяцаслоў». ...
Новы прэфект Кангрэгацыі Ўсходніх Цэркваў9 чэрвеня 2007 году Папа Бенядыкт XVI прызначыў аргентынскага архібіскупа Леанарда Сандры, які да гэтага быў намесьнікам Дзяржсакратара Ватыкану, новым Прэфектам Кангрэгацыі Ўсходніх Цэркваў. Сьвяты Айцец выказаў ...
Слова Апостальскага Візітатара БГКЦ на завяршэньне XIII штогадовай Пілігрымкі беларускіх грэка-католікаўПолацак, 15 ліпеня 2007 г. Дарагія браты і сёстры! 1. Вялікі дзякуй кожнаму з вас, хто сёньня прыйшоў сюды “разам праслаўляць Госпада”. Дзякуй тым з вас, хто ў мінулыя дні ахвярна прайшоў шлях ХІІІ Пілігрымкі беларускіх ...
Разам на шляху веры ў сьвятле ЕвангельляЗ 11 па 15 ліпеня 2007 году адбылася ХІІІ штогадовая Пілігрымка беларускіх грэка-каталікоў. У нядзелю, 15 ліпеня, яна завершылася ў Полацку, каля сьценаў грэка-каталіцкага храму сьв. Параскевы Полацкай. За 4 дні каля ...
Вечная памяць!З матэрыялаў газеты беларусаў у вольным сьвеце “Беларус” даведаліся, што сёлета адыйшлі ў вечнасьць некалькі беларускіх дзеячаў нашай дыяспары, якія, не зважаючы на неспрыяльныя абставіны, праз дзесяцігоддзі ...
