Грэка-каталікі ў Будславе
1-2 ліпеня 2007 году вернікі Беларускай Грэка-Каталіцкай Царквы па традыцыі далучыліся да ўрачыстасьцяў з нагоды сьвята іконы Маці Божай Будслаўскай.
Як і штогод, шматлікія ручаі пілігрымаў з розных куткоў Беларусі сустрэліся ў Будславе і, як рака ў час паводкі, напоўнілі невялікае, але слаўнае беларускае мястэчка. З Менску на сьвята ў Будслаў увечары ў нядзелю, 1 ліпеня, прыбыў аўтобус з грэка-каталіцкімі пілігрымамі, прыкладна ў той самы час прыехалі яшчэ два мікрааўтобусы з вернікамі з Берасьця.
Згодна традыцыі, якая склалася на Будслаўскім фэсьце, заўсёды, блізка апоўначы (а 23-й гадзіне), вернікі візантыйскага абраду сьпяваюць Акафіст Найсьвяцейшай Багародзіцы. Сёлета малітву акафісту ўпершыню ўзначальваў хор вернікаў з берасьцейскай парафіі сьвятых братоў-апосталаў Пятра і Андрэя, але, як і заўсёды, да гэтага малітоўнага праслаўленьня Багародзіцы мог далучыцца кожны вернік. Пасьля акафісту, на ўзьведзеным каля сьцяны будслаўскае сьвятыні алтары, адбылося асьвячэньне копіі іконы Маці Божай Будслаўскай і затым – працэсія са сьвечкамі сьвятароў і шматлікіх вернікаў абодвух абрадаў, у якой узялі ўдзел і беларускія грэка-каталіцкія сьвятары: дэкан Усходняга протапразьбітарату а. Лявонці (Тумоўскі) з Полацку, а. Ігар Кандрацьеў з Берасьця, а. Аляксандр Шаўцоў з Горадні, а. Андрэй Буйніч і новасьвятар а. Яўген Усошын з Менску. Падчас начнога чуваньня ў галоўным каталіцкім санктуарыюме Маці Божай у Беларусі а 2-й гадзіне ночы грэка-каталіцкія сьвятары адслужылі Боскую Літургію ў візантыйскім абрадзе. Набажэнства каля галоўнага алтара перад цудатворнай іконай Маці Божай Будслаўскай узначальваў нядаўна высьвячаны беларускі грэка-каталіцкі сьвятар а. Яўген Усошын. На літургіі сьпяваў імправізаваны хор, які складаўся пераважна з вернікаў менскай і берасьцейскай парафіяў.
2 ліпеня, у дзень сьвята ў гонар цудатворнай іконы Маці Божай Будслаўскай, а 12-й гадзіне сьвятары і вернікі БГКЦ разам з іншымі пілігрымамі маліліся на ўрачыстай сьв. Імшы, якую ўзначальваў Апостальскі Нунцый архібіскуп Марцін Відавіч. Сьвятую Імшу з ім саслужыў амаль увесь епіскапат Рыма-Каталіцкай Царквы ў Беларусі. Разам з ярархамі лацінскага абраду саслужыў таксама і Апостальскі Візітатар для грэка-католікаў Беларусі архімандрыт Сяргей (Гаек). Наогул у Будслаўскім фэсьце ў гонар Багародзіцы сёлета ўзялі ўдзел каля сарака тысячаў вернікаў, прычым, па даўняй традыцыі, ня толькі каталікоў абодвух абрадаў, але і праваслаўных.
а. Андрэй Буйніч, г.Менск
На фота: Будслаў, 2.07.2007. Прыміцыйная Боская Літургія новасьвятара БГКЦ
а. Яўгена Ўсошына ля алтара Маці Божай Будслаўскай.
Гудагай. Мiласэрны позiрк МарыiЁсьць недалёка ад Астраўца, што каля летувіскай мяжы, невялiкае мястэчка Гудагай. Ад iншых беларускіх мястэчак яно адрозьнiваецца тым, што тут ужо не адно стагоддзе адбываюцца цуды, цуды якiя зьвязаны з абразом ...
Слова Апостальскага Візітатара БГКЦ на завяршэньне XIII штогадовай Пілігрымкі беларускіх грэка-католікаўПолацак, 15 ліпеня 2007 г. Дарагія браты і сёстры! 1. Вялікі дзякуй кожнаму з вас, хто сёньня прыйшоў сюды “разам праслаўляць Госпада”. Дзякуй тым з вас, хто ў мінулыя дні ахвярна прайшоў шлях ХІІІ Пілігрымкі беларускіх ...
Пасланьне Апостальскага Нунцыя ў Беларусі архібіскупа Марціна Відавіча да ўдзельнікаў XIII штогадовай Пілігрымкі вернікаў візантыйскага абраду ў БеларусіВіцебск – Полацак, 11-15 ліпеня 2007 г. Дарагія браты і сёстры! «Ласка Госпада нашага Ісуса Хрыста, любоў Бога Айца і супольнасьць Сьвятога Духа хай будуць з усімі вамі» (2 Кар 13, 13). 1. З глыбіні сэрца вітаю вас усіх ...
Разам на шляху веры ў сьвятле ЕвангельляЗ 11 па 15 ліпеня 2007 году адбылася ХІІІ штогадовая Пілігрымка беларускіх грэка-каталікоў. У нядзелю, 15 ліпеня, яна завершылася ў Полацку, каля сьценаў грэка-каталіцкага храму сьв. Параскевы Полацкай. За 4 дні каля ...
100-гадовы юбілей скаўтынгуСёлета 1 жніўня споўнілася сто гадоў з таго дня, як лорд Бадэн Паўэл наладзіў першы летнік скаўтаў на высьпе Броўнсі ў Англіі. З гэтай падзеі пачалася гісторыя руху, які мае на мэце выхаваньне адважных, адказных ...
