Новы Архіпастыр Рыма-Каталіцкай Царквы ў Беларусі

21 верасьня 2007 году Сьвяты Айцец Бенядыкт XVI прызначыў рыма-каталіцкім архібіскупам Мітрапалітам Менска-Магілёўскім Яго Эксцэленцыю архібіскупа Тадэвуша Кандрусевіча, які да гэтага часу зьяўляўся Мітрапалітам архідыяцэзіі Маці Божай у Маскве (Расейская Федэрацыя).

Архібіскупам Мітрапалітам рыма-каталіцкай архідыяцэзіі Маці Божай у Маскве прызначаны мансіньёр Паола Пэццы, які да гэтага часу займаў пасаду рэктара Вышэйшай духоўнай семінарыі “Марыя Каралева Апосталаў” у Санкт-Пецярбургу.

У сваім звароце з нагоды прызначэньня ў Беларусь архібіскуп Тадэвуш Кандрусевіч адзначыў: “Каталiцкi Касьцёл – гэта Сусьветны Касьцёл, якiм кiруе наступнiк сьвятога апостала Пятра. У волi Папы Рымскага я заўсёды бачыў i сёньня бачу волю самога Бога. Гэта – крэда майго сьвятарскага i бiскупскага служэньня. Таму з пачуцьцём велiзарнай адказнасьцi я прымаю новае прызначэньне, якое вяртае мяне ў родную Беларусь. Я вяртаюся, каб далей працягнуць распачатае 18 гадоў таму назад служэньне першага бiскупа на Беларусi ў сучаснай яе гiсторыi i – з вялiкай удзячнасьцю – тую вялікую і неацэнную працу, якую выканаў у Менска-Магiлёўскай архідыяцэзii i ў Касьцёле на Беларусi Сьведка веры кардынал Казiмiр Сьвёнтэк i ў апошнi год – Апостальскi Адмiнiстратар бiскуп Антонi Дзям’янка”.

Уладыка Кандрусевіч выказаў таксама шчырую надзею на супрацоўніцтва з прадстаўнікамі іншых канфесiй i рэлiгiй, асабліва з праваслаўнымі. “Усе мы паклiканыя садзейнiчаць адраджэньню i ўмацаваньню духоўнасьцi ў нашай краiне, а таксама разьвiцьцю дыялогу як памiж намi, так i з грамадзтвам”,– падкрэсьліў у сваім звароце новапрызначаны Архіпастыр Менска-Магілёўскай рыма-каталіцкай архідыяцэзіі.

26 верасьня 2007 году адбылася сустрэча новапрызначанага рыма-каталіцкага архібіскупа Мітрапаліта Менска-Магілёўскага Тадэвуша Кандрусевіча са Старшынёю Камітэту па справах рэлігій і нацыянальнасьцяў пры Савеце Міністраў Рэспублікі Беларусь Леанідам Гулякам. Падчас сустрэчы абодва бакі выказалі гатоўнасьць да канструктыўнага дыялогу і ўзаемадзеяньня на карысьць грамадзтва. Пры гэтым ахрібіскуп Т.Кандрусевіч падкрэсьліў, што хоць “Касьцёл – ня з гэтага сьвету, але існуе ў сьвеце”, таму ня можа быць адарваным ад надзённых праблемаў і выклікаў сучаснасьці. Таксама ён адзначыў, што, як Царква існуе для людзей, таксама і ўлада павінна ўсё рабіць на карысьць грамадзтву.

Цырымонія ўрачыстага ўваходу ў менскую архікатэдру новапрызначанага рыма-каталіцкага ярарха Мітрапаліта Менска-Магілёўскага Тадэвуша Кандрусевіча адбудзецца ў суботу, 10 лістапада 2007 году.

Еще из этой рубрики:

Гудагай. Мiласэрны позiрк Марыi

Ёсьць недалёка ад Астраўца, што каля летувіскай мяжы, невялiкае мястэчка Гудагай. Ад iншых беларускіх мястэчак яно адрозьнiваецца тым, што тут ужо не адно стагоддзе адбываюцца цуды, цуды якiя зьвязаны з абразом ...

Мenologion — каляндар літургічнага ўспаміну сьвятых Усходняй Царквы

Парафія сьв. Мікіты ў Кастамлотах – адзіная на Падляшшы каталіцкая парафія візантыйскага абраду, якая ацалела пасьля Другой усясьветнай вайны ў Польшчы – выпусьціла ў сьвет Menologion, што значыць – «Месяцаслоў». ...

Слова Апостальскага Візітатара БГКЦ на завяршэньне XIII штогадовай Пілігрымкі беларускіх грэка-католікаў

Полацак, 15 ліпеня 2007 г. Дарагія браты і сёстры! 1. Вялікі дзякуй кожнаму з вас, хто сёньня прыйшоў сюды “разам праслаўляць Госпада”. Дзякуй тым з вас, хто ў мінулыя дні ахвярна прайшоў шлях ХІІІ Пілігрымкі беларускіх ...

Сібіу: некалькі акцэнтаў ІІІ Еўрапейскай Экуменічнай Асамблеі

З 4 па 9 верасьня 2007 году ў горадзе Сібіу (Германштадт) ў Румыніі адбылася ІІІ Еўрапейская Экуменічная Асамблея (ЕЭА). Яе дэвізам сталі словы: “Сьвятло Хрыста прасьвятляе ўсіх – надзея на абнаўленьне і еднасьць ...

Вечная памяць!

З матэрыялаў газеты беларусаў у вольным сьвеце “Беларус” даведаліся, што сёлета адыйшлі ў вечнасьць некалькі беларускіх дзеячаў нашай дыяспары, якія, не зважаючы на неспрыяльныя абставіны, праз дзесяцігоддзі ...