100-гадовы юбілей скаўтынгу
Сёлета 1 жніўня споўнілася сто гадоў з таго дня, як лорд Бадэн Паўэл наладзіў першы летнік скаўтаў на высьпе Броўнсі ў Англіі. З гэтай падзеі пачалася гісторыя руху, які мае на мэце выхаваньне адважных, адказных і спраўных маладых людзей.
Афіцэр Брытанскага каралеўскага войска распрацаваў педагогіку, якая выхоўвае дзяцей да жыцьця ў міры й любові з іншымі, да шанаваньня прыроды, да веры ў Бога, да асабістае і грамадзянскае адказнасьці ды шмат якіх іншых важных каштоўнасьцяў. Пачаўшыся з аднаго летніка для некалькіх дзясяткаў хлопчыкаў, сёньня скаўцкі рух налічвае агулам мільёны сябраў – хлопцаў і дзяўчын, а таксама дарослых шэфаў. І гэта сьведчыць пра тое, што важнасьць гэтых каштоўнасьцяў сапраўды не прамінае, а скаўцкі метад па-ранейшаму дае плён.
З нагоды 100-гадовага юбілею 1 жніўня 2007 году а 8-й гадзіне раніцы па ўсім сьвеце скаўты аднаўлялі скаўцкае прырачэньне. Таксама ў гэты дзень Сьвяты Айцец Бенядыкт XVI сустрэўся з прадстаўнікамі Міжнароднага зьвязу гайдаў і скаўтаў Еўропы (FSE), які налічвае каля 60 тысячаў сябраў у 19 краінах Еўропы і Канадзе. «Гэта нагода, каб выразіць нашую блізкасьць і сяброўства»,– так падсумаваў значэньне гэтай сустрэчы Разарыё Баронэ, Генеральны камісар італійскае арганізацыі – адной з сябраў Зьвязу.
А неўзабаве, 4-11 жніўня, праз славацкія ды польскія Татры прайшла міжнародная скаўцкая вандроўка EUROMOOT 2007. Больш за тры тысячы маладых людзей – сябраў Міжнароднага зьвязу гайдаў і скаўтаў Еўропы, у тым ліку хлопцы й дзяўчыны з Беларусі, узялі ў ёй удзел.
Вандроўка пачалася 4 жніўня Боскай Літургіяй ва ўсходнім абрадзе ў грэка-каталіцкім санктуарыюме Багародзіцы ў мястэчку Левоча, што ў Славакіі, і скончылася 11 жніўня начным пераходам-пілігрымкай ды сьвятой Імшой у заходнім абрадзе на Яснай Гары ў польскай Чэнстахове, ля цудатворнай іконы Маці Божай. Такім чынам, вандроўка сымбалічна аб’яднала двое лёгкіх Еўропы – усходнюю і заходнюю хрысьціянскія традыцыі, пра што часта казаў і да чаго ўвесь час заахвочваў папа Ян Павел ІІ.
Удзельнікі Еўрамуту-2007 прадстаўлялі 15 краінаў Еўропы. Самаму старэйшаму з іх было 74 гады. За пяць дзён вандроўкі кожны ўдзельнік прайшоў з поўным рыштункам 70-100 кіламетраў. Падрыхтоўка да мерапрыемства цягнулася каля двух гадоў.
Падчас усяго падарожжа і вандроўкі ў Татрах душпастырскую апеку над беларускімі скаўтамі меў грэка-каталіцкі сьвятар з Горадні а. Алесь Шаўцоў.
Будзем спадзявацца, што сьвяткаваньне 100-ых угодкаў скаўцкага руху надасьць новы магутны імпульс для разьвіцьця хрысьціянскага скаўтынгу на Еўрапейскім кантыненце, у тым ліку і ў роднай Беларусі.
Фотаздымкі з EUROMOOT-2007 можна паглядзець ў Інтэрнэце: www.euromoot.pl Васіль Санковіч, г.Менск
На фота:
1. 4.08.2007, Санктуарыюм Маці Божай у м. Левоча (Славакія). Боскую Літургію для еўрапейскіх скаўтаў узначальвае Ўладыка Ян Бабяк, біскуп Прэшаўскі.
2. На адкрыцьці міжнароднай сустрэчы еўрапейскіх скаўтаў у Татрах EUROMOOT-2007.
3. Беларускія скаўты з а. Алесем Шаўцовым на EUROMOOT-2007.
Сібіу: некалькі акцэнтаў ІІІ Еўрапейскай Экуменічнай АсамблеіЗ 4 па 9 верасьня 2007 году ў горадзе Сібіу (Германштадт) ў Румыніі адбылася ІІІ Еўрапейская Экуменічная Асамблея (ЕЭА). Яе дэвізам сталі словы: “Сьвятло Хрыста прасьвятляе ўсіх – надзея на абнаўленьне і еднасьць ...
Гудагай. Мiласэрны позiрк МарыiЁсьць недалёка ад Астраўца, што каля летувіскай мяжы, невялiкае мястэчка Гудагай. Ад iншых беларускіх мястэчак яно адрозьнiваецца тым, што тут ужо не адно стагоддзе адбываюцца цуды, цуды якiя зьвязаны з абразом ...
Слова Апостальскага Візітатара БГКЦ на завяршэньне XIII штогадовай Пілігрымкі беларускіх грэка-католікаўПолацак, 15 ліпеня 2007 г. Дарагія браты і сёстры! 1. Вялікі дзякуй кожнаму з вас, хто сёньня прыйшоў сюды “разам праслаўляць Госпада”. Дзякуй тым з вас, хто ў мінулыя дні ахвярна прайшоў шлях ХІІІ Пілігрымкі беларускіх ...
Пасланьне Апостальскага Нунцыя ў Беларусі архібіскупа Марціна Відавіча да ўдзельнікаў XIII штогадовай Пілігрымкі вернікаў візантыйскага абраду ў БеларусіВіцебск – Полацак, 11-15 ліпеня 2007 г. Дарагія браты і сёстры! «Ласка Госпада нашага Ісуса Хрыста, любоў Бога Айца і супольнасьць Сьвятога Духа хай будуць з усімі вамі» (2 Кар 13, 13). 1. З глыбіні сэрца вітаю вас усіх ...
Біблія ў беларускім перакладзе: праблема высокага стылюПатрэба Кнiг Старога i Новага Запавету, лiтургiчных тэкстаў, катэхiзiсу, малiтоўнiкаў, багаслоўскiх тэкстаў i iншай рэлiгiйнай лiтаратуры на роднай мове зьяўляецца iстотнай адзнакай духоўнага адраджэньня кожнага народу. ...
